Wed, 19 Dec 2018
26
Manila

SYUDAD SANG ROXAS, Capiz, Disyembre 5 (PIA) -- Ginpahanumdom ni Dr. Jojo Feliciano nga direktor sang Secretariat sang Philippine National Acquired Immunodeficiency Syndrome (AIDS) Council (PNAC) ilabi na sa mga natungdan nga masami naga-entra sa mga "risky behavior" nga magpaidalom sa libre nga human immunodeficiency virus (HIV) testing agud mabuligan sa gilayon sang gobyerno kon mag-positibo sa HIV.

Nahibaluan nga ang mga People Living With HIV/AIDS (PLWHA) nga nakumpirma pinaagi sa laboratoryo nga proseso ang sarang makabaton sang libre nga anti-retroviral nga bulong kag iban pa nga kinahanglanon nga serbisyo nga ginatan-ay sang mga napili-an nga ospital kag sentro para sa ikaayong lawas.

Ang libre nga HIV testing sa Capiz ang ginapatigayon sa Roxas City Health Office, Roxas Memorial Provincial Hospital, Bailan District Hospital sa banwa sang Pontevedra nga may mga ginhanas nga medical technologist para sa nasambit nga proseso.

Ang Provincial Health Office (PHO) ang nagatan-ay man sang kapareho nga serbisyo magluwas pa nga ginadala man sini ang HIV testing sa mga komunidad kag kabanwahanan nga nagakinahanglan.

Samtang ginpahayag man ni Dr. Evelyn T. Bolido nga program coordinator sang HIV/AIDS nga programa sang probinsya nga kalakip pa gid sa ila ginahingyo nga magpaidalom sa HIV - testing amo ang mga nagamabdos nga mga iloy.

Ang HIV testing ang may kaupod nga pre kag post counseling.

Ang probinsya ang may kapin na sa 184 ka mga PLWHA nga na-rekord humalin tuig 1993 tubtob Agosto karon nga tuig.

Ang nasambit nga numero ang kabahin sang kabilogan nga 59,135 nga mga kaso sang PLWHA sa bug-os nga pungsod base sa Setyembre 2018 nga rekord sang PNAC.

Ang istatistika ang ginabug-usan lamang sang mga boluntaryo nga nagpalista sa mga accredited nga health provider sang Department of Health (DOH) ukon sa DOH mismo kag wala pa malakip ang mga indibidwal nga wala pa makahibalo sang ila estado nga PLWHA na gali sila bangod wala pa makapatigayon sang HIV testing. (AAL/PIA6 Capiz)

Sign up for Manila News

a daily newsletter full of things to discuss over drinks.and the great thing is that it's on the house!