Wed, 17 Jul 2019

Hiligaynon News: 50 mil ka puno sang lubi natanom sang Hunyo 25

Philippine Information Agency
12 Jul 2019, 18:38 GMT+10

SYUDAD SANG ROXAS, Capiz, Hulyo 12 (PIA) -- Kapin sa 50,048 ka mga puno sang lubi ang natanom sa ginpatigayon ga One Million Trees in One Day challenge sa probinsya sang Capiz sang Hunyo 25.

Ginpahayag ni Acting Senior Agriculturist Andy Laurilla sang Philippine Coconut Authority (PCA) sa Capiz nga ang nasambit nga mga puo sang lubi ang gintanom sa mga pampubliko kag pribado nga mga lote diri.

Nauna na nga gin-ingganyo ni PCA provincial manager Noel Alvarez ang publiko sa pagtanom sang lubi bangod dako ang bulig sini sa ekonomiya sang pungsod.

Suno man kay Alvarez nga ang PCA sa karon ang may programa nga Participatory Coconut Planting Project, sa diin ang magatanom sang lubi ang pagahatagan sa P40 nga insentibo para sa seedling stage kag pagkatapos sang anom ka bulan matapos ang pagtanom.

Basi sa rekord sang PCA sang 2018, kapin sa 1.9 milyones an gang nagapamunga nga puno sang lubi samtang 900 mil naman ka mga lubi ang wala pa nagapamunga.

Ginpahayag man ni Alvarez nga naglab-ot naman sa 160 mil ang natanom sa probinsya sang Capiz sang nagligad nga tuig kag kapin naman sa 1.5 milyones ka puno sang lubi ang natanom sa nagligad nga lima katuig pagkatapos sang bagyo Yolanda.

Ginpahanumdom man niya ang publiko sa pagkuha sang permit to cut antes mag-utod sang lubi bisan pa sa ila pribado nga mga lote bangud para mapaiway ang penalidad nga paglapas sa Republic Act 8048 o kon ang Coconut Preservation Act of 1995 as amended. (JBG/PIA6-Capiz)

Sign up for Manila News

a daily newsletter full of things to discuss over drinks.and the great thing is that it's on the house!