Mon, 23 Sep 2019

Hiligaynon News: Gobyerno naghatag palangabuhian sa mga mangungoma

Philippine Information Agency
20 Aug 2019, 00:38 GMT+10

SYUDAD SANG ROXAS, Capiz, Agosto 19 (PIA) -- Nagbaton sang grains flatbed mechanical drier ang Putian Farmers Association sang banwa sang Cuartero.

Ini matapos nga natigayon ng aprubahan sang Department of Labor and Employment (DOLE) ang project proposal sang amo nga grupo sa pagbulig sang katapo sang Philippine Army ilabi na sang Community Support Program (CSP) Teams sa amo nga barangay.

Suno kay 61st Infantry Battalion, Philippine Army information officer First Lieutenant Hazel Joy Durotan, ang amo nga proyekto nga nagabalor sang P800,000 ang makabulig sa palangabuhian sang 85 ka mga katapo sang Putian Farmers Association nga ginapamunuan sang ila president nga si Sebedeo Falsis.

Ginapanan-aw man nila nga magadamo pa ang mangin myembro sang amo nga asosasyon nga sarang mabuligan sini.

Suno man kay Durotan nga dako man ang bulig sang lokal nga pamunuan sang barangay Putian kag banwa sang Cuartero agod matigayon ang nasambit nga proyekto.

Sa ginpatigayon nga blessing kag inagurasyon sang amo nga proyekto sining karon lang, ginpaathag ni 61IB commanding officer Lt. Col. Joel Benedict Batara nga ang amo nga proyekto ang isa ka patimaan sang hantop nga pamat-od sa pagbulig sang gobyerno sa mga pumoluyo ilabi na sa mga nabaw-ing nga lugar.

Suno kay Batara nga ang mga katapo sang Army ang sinsero sa pagbulig sa komunidad.

Ang paghatag sang proyekto sa pangabuhian ang nalakip sa mga programa sa idalom sang ginpirmahan ni Presidente Rodrigo Duterte nga Executive Order 70 nga nagatuyo sang "whole of nation approach" para malab-ot ang inclusive kag sustainable nga kalinong para matapos ang local communist armed conflict.

Kalakip sa nagtambong sa amo nga inagurasyon sanday 301st Infantry Brigade commander Col. Orlando Edralin, Engr. Jez Balad-on sang DOLE Capiz, Cuartero Sangguniang Bayan member Abner Falsis, Putian Punong Barangay Nes Foyunan kag Pastor Yancy Japhet Martinez sang Putian Evangelical Church. (JBG/PIA6-Capiz)

Sign up for Manila News

a daily newsletter full of things to discuss over drinks.and the great thing is that it's on the house!