Mon, 23 Sep 2019

Aklanon News: Aklan PAC-PTD, gin abi-abi rong bag-ong mga miyembro

Philippine Information Agency
20 Aug 2019, 00:38 GMT+10

KALIBO, Aklan, Agosto 19 (PIA) -- Mainit nga gin abi-abi it Provincial Advisory Council for Police Transformation and Development (PAC-PTD) it Aklan Police Provincial Office (APPO) ro mga bag-o karang entra nga mga miyembro nga halin sa sari-saring sector sa probinsya sa ikap-at nga meeting kara nga ginhiwat sa Kitty's Kitchen sa Kalibo.

Ginpasumpa man ro mga bag-o nga miyembro ngara sa andang paeangakuan. Sanda ra hay ginpasumpa ni APPO Acting Provincial Director Police Colonel Esmeraldo Osia, Jr.

Ro mga ginpasumpa hay sanday Rev. Fr. Vincent Cajilig (religious); Dr. Ma. Jhoanna Guarin (academe); Jaslyn Amacio (youth sector); ag Rommel Constantino (LGBTQ).

Ro PAC-PTD hay nagaserbe bilang "advisory body" it PNP sa pag implementar it Peace and order Agenda for Transformation and Upholding of the Rule of Law (PATROL) Plan 20130.

Ro pagpasumpa it mga bag-ong miyembro hay ginhiwat bilang primerong parte it aktibidad, nga ginsundan it pagpirma it sangka Memorandum of Agreement (MOA) sa tunga it APPO ag Aklan Bagong Buhay Handum Naton (BAGHAY) Incorporated, sangka civil society organization nga natuga halin sa pag organisar it PAC-PTD sa Aklan.

Ro BAGHAY hay gintuga agud mangin katuwang it Aklan PNP agud dueaon ro illegal nga droga paagi sa pagtao it bulig pinansyal ag lohistikal nga suporta sa mga operasyon kontra droga.

Pormal nga ginlunsar ro BAGHAY ku Nobyembre 19, 2016 sa pagsuporta it programa it PNP-Aklan may kaangtanan sa deklarasyon ni Presidente Rodrigo Duterte it giyera kontra illegal nga droga sa nasyon.

Ro Aklan BAGHAY hay rehistrado eon makaron sa Security and Exchange Commission.

Si Osia ro nagrepresentar sa APPO sa pagpirma sa MOA samtang ro BAGHAY hay ginrepresentar ni Ramel Buncalan, ro Presidente kara.

Ginhambae ni Osias nga ro pagpirma it MOA sa tunga it daywang ka partido hay magasuporta sa pag eksister it BAGHAY ag obrahong pormal ro ana karang relasyon sa APPO.

Ginapanan-aw man nga ro pagpirma it MOA hay magatuga it magabuhay nga kolaborasyon it PNP-aklan ag sa mga katuwang kara para sa pag atenar it mga ginahandum bilang capable, epektibo ag may kredibilidad nga serbisyo it pulis.

Pagkatapos it pagpirma it MOA, nagsunod ro pormal nga meeting it PAC-PTD kon siin gin istoryahan ro mga plano it konseho kaibahan ro APPO agud markahan ro ikatlo nga anibersaryo it BAGHAY sa Nobyembre 21-24 it dag-on ngara. (JBG/VGV PIA6 Aklan)

Sign up for Manila News

a daily newsletter full of things to discuss over drinks.and the great thing is that it's on the house!