Fri, 18 Sep 2020

Cebuano News: BARMM motabang sa mga apektado sa krisis sa COVID-19

Philippine Information Agency
25 Mar 2020, 04:38 GMT+10

MARAWI CITY, Marso 24 (PIA) - Ang Bangsamoro Government gikatakdang mag-apod-apod sa mga hinabang ngadto sa mga residente sa Bangsamoro Autonomous Region in Muslim Mindanao (BARMM) nga apektado sa krisis tungod sa Coronavirus Disease 2019 (COVID-19).

Kini ang gibutyag ni Spokesperson Mohammad Asnin Pendatun sa BARMM Inter-Agency Task Force (IATF) sa COVID-19 atol sa Press Briefing niadtong Lunes, Marso 23.

Matud pa ni Pendatun nga ang hinabang nga mga food packs naay sulod nga 25 kilos nga bugas, napulo (10) kabuok nga noodles, pito (7) ka de lata nga corned beef, pito (7) ka de lata nga tuna, duha (2) ka lata nga sardinas, ug mga 3-in-1 nga kape.

"Ang Ministry of Social Services and Development (MSSD-BARMM) naghatag na daan ug pundo sa tanan nga mga probinsya aron didto nalang sa ilang probinsya mamalit sa mga butang nga gikinahanglan tungod kay naa kita karon sa 'community quarantine' nga kahimtang," ingon ni Pendatun.

Dugang pa ni Pendatun nga mikabat sa P7,293,334 nga kantidad ang unang pundo nga 'gi-download' sa mga probinsya pinaagi sa MSSD-BARMM. Gituyo kini aron mahatagan ug hinabang ang mga komunidad sa BARMM nga apektado sa negatibong epekto sa ekonomiya tungod sa COVID-19.

"Kini pasiuna pa lang, among sigurohon nga maka dawat ug hinabang ang mga katawhan labi na ang mga tawo nga mas nanginahanglan," ingon ni Pendatun.

Ang Office of the Chief Minister (OCM) nag-andam usab alang sa pinansiyal nga tabang para sa tanan nga mga empleyado sa BARMM base sa Department of Labor and Employment's (DOLE) Labor Advisory No. 12 nga nag deklara nga ang tanan nga mga trabahante sa tibuok nasud-bisan unsa ang kahimtang-naay makuha nga 'cash aid' nga nagkantidad ug P5,000.

"Our plan is, on top of the P5,000 cash aid, may ibibigay din tayong relief packs for all the employees. (Ang atong plano mao nga, gawas sa singko mil (P5,000) nga cash isip hinabang, maghatag pud ta ug relief packs para sa tanan nga mga empleyado)," dugang ni Pendatun.

Samtang, ang Ministry of Health sa BARMM nga si Dr. Saffrullah Dipatuan miingon nga ang MOH-BARMM mag-download usab sa kantidad nga P2-milyon sa matag Rural Health Units (RHU) sa rehiyon aron masiguro ang mga suplay sa medisina ug kagamitan.

"Hindi pwedeng mawalan ng supplies tulad ng mga gamot ang mga RHUs natin. We will download the additional fund as soon as possible (Dili mahimo nga mawad-an ug mga suplay sama sa mga tambal ang RHUs. Among i-download ang dugang nga pundo sa labing madali," ingon ni Dipatuan.

Gidugang sab ni Dipatuan nga ang tanan nga gasto sa mga pasyente sa COVID-19 sa BARMM masakop sa ayudang medikal kon 'medical assistance' gikan sa Bangsamoro nga programa sa tanan nga akreditado ug kauban nga ospital sa tibuok rehiyon sa Bangsamoro. (Bernadith G. Epan/PIA-ICIC)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!