Wed, 01 Apr 2020

Cebuano News: BARMM misubay sa mga delegado sa 'Tabligh' sa Malaysia

Philippine Information Agency
25 Mar 2020, 04:38 GMT+10

MARAWI CITY, Marso 24 (PIA)-Gisubay sa Bangsamoro Inter-Agency Task Force (IATF) sa COVID-19 ang mga Pilipino-Muslim nga mi-apil sa usa ka panagtigum sa Islamic nga mga magwawali kon kining gitawag nga "Tabligh" nga bag-o lang gipahigayon sa Kuala Lumpur, Malaysia.

Tungod kini kay sumala pa sa National Commission on Muslim Filipinos (NCMF) naay 215 ka mga Pilipino ang mitambong sa relihiyosong panagtigum. Ang giingon nga panagtigum gi-report nga may kalabutan daw sa paspas nga pagdaghan sa kumpirmadong mga kaso sa COVID-19 didto sa Malaysia.

Kining "Tabligh" kon Islamic nga panagtigom sa mga magwawali nga gitambongan sa kapin 16,000 ka mga partisipante, gipahigayon kini niadtong Pebrero 27 hangtud Marso 1, didto sa Jamek Sri Petalling Mosque sa Kuala Lumpur.

"Naa na tay lista sa uban nga mga ngalan," miingon si Mohammad Asnin Pendatun, ang tigpamaba kon spokesperson sa Bangsamoro Inter-agency Task Force atol sa pinakaulahing gipahigayon nga press conference.

Dugang niya nga ang uban nga mga partisipante mi-boluntaryo na nga magpa- 'self-quarantine'.

Sa kasamtangan, ang Minister of Health nga si Dr. Saffrullah Dipatuan nag-ingon nga wala pa silay tukma nga ihap ug porsyento kung pila ang taga BARMM ug pila pud ang dili.

Dugang niya nga dili pud klaro kung mitambong ba gyod sa giingon nga panagtigum ang tanan nga mga partisipante gikan sa Pilipinas.

"Malaking challenge ito dahil karamihan ay ayaw aminin na sila ay galing sa Malaysia, at iniisip nila na kapag na-identify sila ay magkakaroon sila ng 'social stig'. (Dako kini nga hagit tungod kay ang kadaghanan dili gusto mag pa-ila nga gikan sila sa Malaysia, kay kung sila mailhan makakuha sila ug 'social stigma)," dugang ingon niya.

Nakigsabot karon ang BARMM IATF sa NCMF ug sa gobyerno sa Malaysia alang sa mga ngalan sa mga partisipante. Gihangyo usab sa Task Force ang mga partisipante nga boluntaryong mosumite sa ilang kaugalingon aron mohatag sa ngalan sa uban pa nga ilang nailhan.

Samtang gipahayag ni Health Minister Saffrullah Dipatuan nga ang namatay nga si "Patient 40 (PH40)" sa Rehiyon 10, gikan kini sa Lanao del Sur. Gibutyag ni Dipatuan nga kini si "PH40" nibalhin na ug puyo sa Metro Manila pagkahuman sa 'Marawi siege" ug mibisita lang ug balik sa ilang lungsod.

Pag-abot sa pasyente gikan sa Laguindingan Airport sa Cagayan de Oro City, gi-admit kini sa Adventist Medical Center sa Iligan City, ug ayha pa dayon kini gi-refer sa Northern Mindanao Medical Center, dugang niya.

Base sa report sa Ministry of Health, naay 996 ka mga "Persons Under Monitoring (PUM)" ug 43 ka mga "Persons Under Investigation (PUI)" sa tibuok rehiyon sa Bangsamoro. (Zenaida D. Jagudilla/PIA-ICIC)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!