Tue, 02 Jun 2020

Tagalog News: 395 stranded na mga pasahero sa Palawan, nakaalis na

Philippine Information Agency
27 Mar 2020, 16:38 GMT+10

PUERTO PRINCESA, Palawan, Mar. 27 (PIA) -- Nakaalis na ang paunang 395 na mga na-stranded na pasahero sa Palawan kahapon sa tatlong mercy flights ng Cebu Pacific na kinomisyon ng Department of Tourism (DOT).

Ito ang kinumpirma ni Provincial Tourism Officer Maribel Buni sa panayam ng Philippine Information Agency (PIA)-Palawan.

Ang mga na-stranded na pasahero ay naapektuhan matapos na ipatupad ang Enhanced Community Quarantine sa buong Luzon dahil sa pagkalat ng Coronavirus Disease 2019 (COVID-19).

Ayon kay Buni, sa unang consolidation nila ng mga na-stranded na pasahero ay nakapagtala sila ng 700 na mga foreign national kung saan ang 278 sa mga ito ay mula sa bayan El Nido, habang 202 naman sa San Vicente at 210 sa Lungsod ng Puerto Princesa.

Ngunit maaari pa rin aniyang madagdagan ang bilang na ito dahil patuloy pa ring isinasagawa ng Provincial Tourism Office ang consolidation ng mga na-stranded na mga turistang dayuhan sa Palawan.

Dagdag pa ni Buni, naisakatuparan ang pagpapasakay sa mga na-stranded na dayuhan sa pamamagitan ng pakikipag-ugnayan ng mga embahada sa DOT.

Sa pagpapa-uwi sa mga ito ay siniguro ng pamahalaang panlalawigan ang pagpapatupad ng mahigpit na protocol upang matiyak na ligtas ang mga ito at maiwasan ang posibilidad na maaaring makahawa ng virus ang mga ito.

Bukas ay maaari pa rin aniyang magkaroon ng mercy flights dahil nakikipag-ugnayan na ang embahada ng Russia sa Pilipinas upang matulungan ang kanilang mga mamamayan na nasa lalawigan. (OCJ/PIA-Palawan)

Sign up for Manila News

a daily newsletter full of things to discuss over drinks.and the great thing is that it's on the house!