Tue, 02 Jun 2020

P3 milyones medical subsidy, gitunol ni Gov. Emano sa Oro hospitals

Philippine Information Agency
28 Mar 2020, 16:38 GMT+10

MISAMIS ORIENTAL, March 28 - MIKABAT sa P3 milyones nga pundo ang gitunol ni Gov. Bambi Emano ngadto sa tulo ka balay tambalanan sa dakbayan sa Cagayan de Oro karon lang, Huebes, Marso 26, 2020, aron maggamit isip medical subsidy niadtong pasyente nga walay ikasarang ibayad sa ilang hospitals bills nga excess sa Philhealth insurance.

Human sa pinirmahay sa Memorandum of Understanding (MOU) tali sa Misamis Oriental Provincial Government ug chief of hospitals sa Capitol University Medical Center (CUMC), Cagayan de Oro Polymedic General Hospital (Polymedic) ug Maria Reyna XU-Hospital (Maria Reyna), naka-deposito na ang maong pundo isip subsidy sa kabus gikan sa Misamis Oriental nga masulod sa ilang tagsa-tagsa ka ospital, samtang dili pa modawat ang Northern Mindanao Medical Center (NMMC) og non-COVID-19 patients.

Gisiguro ni Gov. Emano nga dili cash o cheque, kon dili pinaagi sa bank deposit ang iyang gitunol nga pundo aron dunay "debit ug credit" isip basehan kon adunay gihimong transaksiyon. Kini, aron adunay kasihag ug dayag ang paggasto sa kwarta sa katawhan sa Misamis Oriental. Tag-usa ka milyon ka pesos ang nadawat sa naasoy'ng tulo ka tambalanan.

Unod sa MOU nga maggahin og 20 porsiyento sa kinatibuk-ang bed capacity ang nasangpit nga tulo ka ospital alang sa no-balance billing policy (NBB) sa Philhealth. Ang sobra dayon sa balayrunon pagakuhaon gikan sa nasangpit nga medical subsidy, aron mogawas sa balay tambalanan ang pasyente nga walay bisan piso nga bayaran.

Apan, matud ni Provincial Health Officer Dr. Jerie Calingasan, kinahanglan ang hugot nga monitoring nga molupyo gayud sa Misamis Oriental ang pasyente nga matabangan niini nga programa ug inisyatibo ni Gov. Emano, tungod kay ang pundo gikan sa buwis sa katawhan sa nasangpit nga lalawigan. Nagkinahanglan og letter-endorsement gikan kang Dr. Calingasan kinsa man nga taga Misamis Oriental ang maadmit sa nasangpit nga pribadong tambalanan nga nahimutang sa dakbayan sa Cagayan de Oro.

Kung dunay sobra sa pundo, hugot nga mando ni Gov. Emano nga ibalik gayud kini sa panudlanan sa kapitolyo. Sila si Dr. Jess Jardin ug Dra. Tisha Emano-Elazegui sa Philippine Medical Doctors Association of Cagayan de Oro; Jose Ray Deleste III sa CUMC; Sr. Carmelita Buot sa Maria Reyna; Marlon Arrabaca sa Philhealth Cagayan de Oro Local Health Insurance; George Michael Lim ug Cris Taneo sa Polymedic; Jocelyn Torrecampo sa MisOr; ug Nina Gumban sa Maria Reyna, nahangop uyamot sa talagsaon nga lakang ni Gov. Bambi Emano aron makatabang nga makunhoran ang ihap sa pasyente sulod sa NMMC nga karon nahimong COVID-19 point hospital sa tibuok Rehiyon 10.

Sign up for Manila News

a daily newsletter full of things to discuss over drinks.and the great thing is that it's on the house!