Fri, 18 Sep 2020

Kinaray-a News: Modernization program ginapatigayon kang BFP

Philippine Information Agency
07 Aug 2020, 00:38 GMT+10

SAN JOSE, Antique, Agosto 6 (PIA) -- Ginkalipay ni Fire Senior Superintendent kag Bureau of Fire Protection (BFP)-6 regional director Jerry Candido ang ginapatigayon nga modernization program kang BFP nga ginsambit ni President Rodrigo Duterte sa ana nga State of the Nation Address (SONA).

Sa ana nga pagbisita rugya sa Antique, ginpahayag ni Candido nga ang Presidente seryoso sa pagpasanyog kang mga kagamitan kang BFP ilabi na sa mga bombero. Suno kana, may rugyan kang P50 bilyon nga pondo nga na-alokar para sa nahauna nga bahin kang firefighting equipment modernization.

Ginpaathag ni Candido nga nagakinahanglan kang P150 bilyon ang modernization program kang BFP nalakip na ang pagpatindog kang fire station, apang masyado ka bahol tana nga kantidad, gani amat-amatun lamang ang implementasyon.

Nalakip sa upgrading program amo ang pagtugro kang mga fire trucks sa kada banwa, kag pagbakal kang dugang nga mga area ladders, kag firefighting helicopters.

Gindugang hambal ni Candido, nga ang firefighting aircraft ang sangka bag-o nga teknolohiya nga may rugyan kang fire pump kag may ikasarang sa pagbuga kang tubig sa mga mataas nga lugar.

Mahimo man nga magamit ang firefighting helicopter bilang rescue transportation kag ambulansya.

Tatlo ka mga firefighting helicopters ang pagabaklon kang BFP kag dya ang ipahamtang sa Luzon, Visayas, kag Mindanao.

Nagpahanumdom man ang regional director nga padayon sa gihapon ang mga katawhan sa pag-obserbar kang fire prevention ukon pag-andam batok sa halit nga dulot kang kalayo. (JSC/LML/PIA6 Antique)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!