Sun, 28 Feb 2021

Rehabilitasyon sa industriya sa lubi gipakusog pa ni gobernador Bambi

Philippine Information Agency
27 Jan 2021, 19:38 GMT+10

MISAMIS ORIENTAL, Enero 27 - Usa ka grupo ang gipadala sa Provincial Agriculture Office (PAGRO) ngadto sa Philippine Coconut Authority (PCA) Davao Research Center sa Bago-Oshiro, Davao City.

Kini aron magkuha og mokabat 16,790 ka mga coco-seed nuts nga gilangkuban sa nagkalain-laing variety sa lubi aron ipang apod-apod sa mga mag-uuma sa lalawigan.

Ang maong grupo gipangunahan ni Ms. Michelle Ross Valmores-Lace kinsa Senior Agriculturist sa PAGRO nga maoy nagdumala sa operasyon sa pagdala niini sa lalawigan inubanan sa koordinasyon ngadto kang Dr. Liberty H. Canja, Research Manager sa PCA Davao Research Center aron magarantiya ang suplay sa mga coco-seed nuts alang sa Misamis Oriental.

Ang sunod-sunod nga pagsuplay sa PAGRO sa mga bag-ong lubi sa lalawigan nagikan sa tinguha ni Gobernador Bambi Emano ug Provincial Agriculturist Jose Apollo Pacamalan nga alang sa gikatakda nga bag-ong direksyon sa pagpalambo sa industriya sa lubi sa lalawigan.

Gumikan sa katigulang sa mga punuoan sa lubi nga makita dinhi lalawigan maoy hinungdan nga nag-ubos na ang produksyon niini.

Buot ni Gobernador Bambi Emano ug PAGRO Head Pacamalan nga ipahigayon ang rehabilitasyon sa mga lubi sa tibuok Misamis Oriental aron mokusog og balik ang produksyon inubanan sa pagpalambo sa uban pang klase sa lubi aron modaghan ang kapilian sa mga mag-uuma.

Sa lima ka mga dumptrucks nga gikargahan sa mga coco-seed nuts, usa ang gigahin alang sa Macapuno, usa sa mga variety nga gustong ipalambo ug suportahan ni Gobernador Bambi tungod sa kusog nga panginahanglan sa mga produkto niini sa local ug internasyonal nga merkado.

Tinguha sab ni Gobernador Bambi nga palambuon ang produksyon sa Macapuno aron makabaton og bag-ong mga oportunidad ang mga mag-uuma sa lalawigan.

Pagpalambo sa panginabuhian maoy kanunay nga prayoridad sa liderato karon ni Gobernador Bambi ug bisan paman anaa sa panahon sa pandemya dili mapakgang ang paghatag serbisyo niini alang sa katawhan. (MisOr PIO)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!