Fri, 26 Feb 2021

Cebuano News: Ika-21 nga Ubi Festival gibuksan sa Bohol

Philippine Information Agency
27 Jan 2021, 20:38 GMT+10

TAGBILARAN CITY, Jan. 26 (PIA) -- Taliwala sa COVID-19 pandemic, gibuksan ang ika-21 nga Ubi Festival sa Old City Airport ning syudad niadtong Lunes, Enero 25, 2021.

Gipahigayon ubos sa new normal, ang Ubi Festival karong tuiga nagdala sa tema nga "Pagpananum og Ubi Napuslan, Kagutom Nga Dala sa COVID-19 Nabatukan."

Molanat kini taman sa Pebrero 24, 2021 diin ginabaligya ang nagkalain-laing klase sa ubi nga ani sa nagkalain-laing lungsod sa lalawigan.

Ang labing kinaham nga Ubi Kinampay, mapalit sa P90 matag kilo samtang P70 usab ang ubang klase sa ubi.

Ang probinsyal nga kagamhanan sa Bohol mipili sa Old Tagbilaran City Airport isip festival venue ning tuiga aron pagseguro nga hingpit nga mapatuman ang basic health protocols ilabi na ang physical distancing.

Ang Ubi Festival 2021 gisugdan sa motorcade alas 8 sa buntag niadtong Lunes nga nanukad sa Provincial Capitol Grounds paingon sa New Capitol Site Road - Hangos St. - J.A. Clarin- City Hall Grounds - Calceta St.- luyo sa J.A. Clarin St.- PNB-CPG Avenue - City Airport Road lahos na sa venue nga gisalmotan sa mga Ubi Growers, local government units, non-government associations, Peoples' Organization ug sa Technical Working Group sa maong festival.

Si Gob. Arthur Yap atol sa opening program mitumbok sa kamahinungdanon sa impak sa pagtanom ug pag-ani sa Ubi isip panginabuhian sa mga Bol-anon nga nakatabang gayud og daku sa paghupay sa kagutom taliwala sa pandemya.

Gipangunahan ni Gob. Yap ang ribbon cutting ug pagbukas sa exhibits inubanan nilang Bise Gob. Rene Relampagos, Tagbilaran City Mayor John Geesnel Baba Yap II, First Lady Jane Yap, Assistant Provincial Agriculturist Larry Pamugas, Miss Bohol 2019 Celina Villoceno ug Miss Universe Philippines 2020- 3rd Runner Up ug Ambassador of Tourism, Pauline Amelinckx.

Gawas sa mga produktong ubi ug ubang produktong agrikultura, may mga ornamental nga tanom ug mga buwak usab nga ginabaligya.

May nagkalain-laing contests usab nga ipahigayon sama sa pinakadaghang baligyang Ubi display, Pinaka sa nagkalain-laing Ubi varieties, outstanding Ubi growers, cooked Ubi Eating, Ubi Tabirak eating, ug literary musical contests (Bugno sa Rondalla, Ubi Balitaw, Del Horest ug Sarah Geronimo voices alike.

Ubang kalihokan usab ang ginapahigayon atol sa festival sama sa nightly entertainment, food fair, techno fora, Ubi cook off, arnis demo ug zumba.

Ang Ubi Festival gisaulog sa mga Bol-anon matag tuig isip pag-ila sa mga tigtanom og ubi sa tibuok lalawigan sukad pa niadtong tuig 2000. (ecb/PIA7-Bohol)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!