Tue, 20 Apr 2021

Aklanon News: PCCI ginaduso ro RT-PCR saliva testing sa Boracay

Philippine Information Agency
28 Feb 2021, 04:38 GMT+10

KALIBO, Aklan, Pebrero 27 (PIA) - Sa pagpatikasog nga mabuligan nga makabangon ro ekonomiya sa rehiyon, dungan nga nag-apela ro Philippine Chamber of Commerce and Industry (PCCI) chapters sa Western Visayas para sa implementasyon it Real Time Polymerase Chain Reaction (RT-PCR) Saliva Test sa Isla it Boracay.

Base sa apela, nagahinyo ro PICC sa Boracay Inter- Agency Task Force nga seryosohon nga studyuhan ag kunsiderahun; ag kung hara hay kabatun-baton ag masaligan, hay dayon nga aprubahan ro paggamit it RT-PCR Saliva Test bilang alternatibo nga pamaagi sa pagtest sa mga magaagto nga mga turista sa Boracay.

Ro nasambit nga apela hay nakapangalan kanday Department of Environment and Natural Resources Secretary ag Boracay IATF chair Roy Cimatu, Department of the Interior and Local Government Secretary ag Boracay IATF vice-chair Eduardo Ano ag Department of Tourism Secretary ag Boracay co-vice chair Bernadette Romulo-Puyat.

Suno sa position paper ro aprubado nga RT-PCR Saliva Test it Department of Health (DOH) hay barato, madasig, ag maeumo ro pag-administer kumpara sa swab test.

Ro PCCI chapters hay nagapangayo man it suporta halin sa gobyerno para mag-establisar man it molecular laboratory para sa saliva testing sa Caticlan ag/ukon sa Isla it Boracay.

Base man gihapon sa apela, raya nga pamaagi (RT-PCR saliva testing) hay bukon eamang ro mga taga-Boracay ro makabenepisyo kundi ro bilog nga Western Visayas, dahil halin man sa nagkaea-in ea-in nga syudad ag probinsya sa rehiyon ro nagasuplay it trabahador ag materyales sa isla.

Dugang pa kara nga ro madinag-on nga pag-implementar it COVID Saliva Testing ag ro mabaskog nga pagpatikasog sa pagbangon it Boracay hay mangin serbe nga modelo sa tanan nga mga mayor nga tourist destinations sa nasyon.

Tungod sa sunud-sunod nga pagkadakop it mga turista dahil sa pagsumite it peke nga resulta it RT-PCR test, ro rayang proposal hay nahimo; ag hara hay patunay nga abo sa gihapon ro seryoso ag interado nga sa uman hay makabisita sa sikat nga isla eabi eon gid sa hara nga summer season.

Ro apela hay ginpirmahan nanday PCCI - Boracay president Wesley Van Der Voort, Antique CCI president Vicente P. Lagunday, PCCI - Aklan Chapter president Ramel V. Buncalan, Capiz Halaran CCI president Engr. Dale F. Bernas, Metro Bacolod CCI president Roberto L. Montelibano, Guimaras CCI president Neptune Pittman, PCCI - Iloilo president Atty. Jobert A. Penaflorida ag PCCI Western Visayas regional governor Ronald U. So. (JSC/QP/PIA6 Aklan)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!