Tue, 18 May 2021

Cebuano News: DOTr mipasalig: Pantalan sa Maribojoc magamit sa Hunyo

Philippine Information Agency
15 Apr 2021, 20:38 GMT+10

GIPANGUNAHAN NI SEC TUGADE. Mismo ang kalihim sa DOTr ang nanguna sa pagsubay sa dagan sa proyekto nga pantalan sa Maribojoc, isip mao nay dungguan sa mga containerized cargo aron maiway sa peligro ug maluag ang pantalan sa tagbilaran. (rahc/PIA-7/Bohol)

TAGBILARAN CITY, Bohol, April 15 (PIA) -- Gipasalig ni Department of Transportation Secretary Arthur Tugade ngadto sa mga Bol-aon nga iya nga ipahuman na ang bag-o nga gipaayo, gipalapdan ug gisumpayan nga pantalan sa Maribojoc sa dili pa mo Hunyo.

Gani, sa saad ni Tugade sa iyang pagbisita aron pagpanguna sa pagbukas sa ikaduha nga Passenger Terminal Building sa Port of Tagbilaran, matud niya, iyang humanon ang pantalan sa Maribojoc ug himoon kining operational sa Mayo o Hunyo, 2021.

Ang gipabag-o nga pantalan sa Maribojoc, unang gilantawan sa kagamhanan nga himoon nga dungguanan sa mga container cargoes nga mao usab ang nakatampo sa paghuot sa paglihok-lihok sa tawo ug kargamento sa pantalan sa Tagbilaran.

Matud ni Tugade, sa iyang una nga pagsubay sa pantalan sa Maribojoc niadtong paghuman sa linog sa 2013, iyang nakita nga nangahugno ang gipangpatong-patong nga bato agi og pag reclaim sa yuta aron mahimong pantalan nga maagi-an usab sa mga sakyanan.

Sa kantidad nga P 480, 948, 770.00, gipatrabaho ang pantalan aron maoy himoon nga dungguanan sa mga dagkong kargamento aron usab maluag-luagan ang pantalan sa Tagbilaran, niadtong Marso 2018.

Sa mga naagi-an nga kakuli-an, kaduha na masibog ang petsa sa pag-pahiuli sa pantalan niadto untang kapausan sa Enero 202o, ug ngadto na sa Febrero 2021.

Apan, sa paglisud sa pagpadala sa mga kargamento ug kahimanan sa pagtibawas sa nahisgutan nga imprastraktura, mapugos na ang kahumanan niini, bisan pa sa gisagubang nga mga kalisud sa pagpadala sa mga materyales.

Proyekto nga gipatuman sa Philippine Ports Authority, ang pantalan sa Maribojoc nagpahigayon sa pagpataas sa iyang tinuyo nga agi-anan, pagpalapad niini, pagpahimutang sa mga linya sa korente ug tubig, pagsemento sa tinuok pantalan ug pagbutang sa kinatibuk-ang back-up area.

Apil usab sa pundo nga gigahin sa pantalan sa Maribojoc ang pagpalapad sa agi-anan gikan sa pantalan paingon sa higway sa Maribojoc,

Si Sec Tugade, giubanan ni Philippine Ports Authority Administrator James Daniel Santiago, House Committee on Transportation chair Cong Edgar Sarmiento, Gobernador Arthur Yap, PPA Tagbilaran Port Manager Engr. James Gantalao ug mga opisyales sa DOTR.

Ang pantalan sa Maribojoc, kon mahuman na, may daku nga ikatabang aron maluagan ang Tagbilaran, kalikayan ang aksidente nga mahitabo kon may mga tawo nga magtaboktabok kon may mga daghong trucks nga magbunlot sa mga kargamento.

Kini usab magdugang sa mas paspas nga pagtabok sa mga patigayon nga maoy gikinahanglan aron ang Bohol makapasugod sa pag-ugmad sa mas lalapad nga sukaranan sa ekonomiya, aron dili kini dali nga mapukling.

Kahinumduman nga mas daku ang epekto sa crisis nga dala sa pandemya sa Bohol, sanglit ang ekonomiya dinhi nga nagsalig sa turismo ug serbisyo, dili makatunhay kon walay tawo nga makasulod aron mosuroy ug maserbisyohan. (rahc/PIA-7/Bohol)

More Manila News

Access More

Sign up for Manila News

a daily newsletter full of things to discuss over drinks.and the great thing is that it's on the house!